വഴിയമ്പലം

അഴകറവിന്‍റെ മാംസച്ചന്തകളില്‍

ഉടലാട്ടങ്ങളുടെ പൊന്‍പണത്തിളക്കം.

കമ്പോളക്കടലില്‍ വമ്പൊടുങ്ങാത്ത 

സ്ത്രീത്വത്തിന്റെ ചാകരക്കൊയ്ത്ത്!

ധരാധരം നുണഞ്ഞയാദ്യവധ(1) ചുടു -

നിണത്തിനുമുണ്ടൊരു നാരീ ഗന്ധമെങ്കിലും

പ്രണയം, ലോകാത്ഭുത രമ്യഹര്‍മ്മ്യങ്ങളില്‍ 

ശിരസ്സുയര്‍ത്തിപ്രണമിക്കുന്നു,നാരിയെ......!!(2)

വേശ്യതന്‍ വശ്യ കാമനത്തളികയി-

ലറുത്തിട്ട  ശിരസ്സിലൊഴുകുന്നു,

പെണ്‍ഭ്രമത്തിനധികാര ദുശ്ശാസനം.(3)

കുഴിച്ചിട്ട(4) പെണ്‍കുഞ്ഞിന്‍ മണ -

ലാഴങ്ങളിലലറിയ കരളുകളുടെ

ഉള്ളുയിരിനു തീകൊടുത്തു,മനംനൊന്ത 

വിശ്വവിമോചന സ്നേഹശാസനം.

അഴിച്ചിട്ട(5) കാര്‍കൂന്തലിലാടിയുലഞ്ഞ

അധര്‍മ്മ സിംഹാസനങ്ങളില്‍ 

മുഴങ്ങുന്നിന്നും പണയപ്പെടുന്ന

പെണ്‍ശപഥങ്ങളുടെ അകംവിളി.........!!

പ്രലപനങ്ങളില്‍ പ്രകോപനം കത്തിക്കു-

മാപല്‍ തീജ്വാലകളില്‍ വംശ വെറികള്‍ 

അടിവേരടയാളങ്ങള്‍ക്കും വിഷശരമെയ്യവേ,

കേള്‍ക്കുന്നില്ലേ,അരുതേ,അരുതേയെന്ന 

മരുപ്പച്ചകള്‍ തഴുകിയുണര്‍ന്നെത്തുമരുമ

പ്രത്യാശകളുടെ വേദവിളി ..........!!

___________________________________

(1)-ആദമിന്‍റെ മക്കള്‍ തമ്മില്‍ നടന്ന ആദ്യ വധം.

(2)-താജ്മഹല്‍ 

(3)-യോഹന്നാന്‍ പ്രവാചകന്‍റെ ശിരസ്സറുത്ത സംഭവം.

(4)-അറേബ്യയില്‍ പെണ്‍കുഞ്ഞുങ്ങളെ ജീവനോടെ കുഴിച്ചിട്ടിരുന്ന മുഹമ്മദ്‌ നബിക്കു

മുമ്പു നടന്നിരുന്ന കിരാത സമ്പ്രദായം.

(5)ദ്രൌപദി ശപഥം

**************