ഷഷ്ടിപൂര്‍ത്തി

കഷ്ടിച്ച് അരിഷ്ടിക്കൊന്നും 

കഷ്ടപ്പാടില്ലാതെ 

ഷഷ്ടിപൂര്‍ത്തിയും 

കഴിഞ്ഞു .......

ഇനിയിപ്പോള്‍ -

മറുപുറം, 

ഇഷ്ടപ്പെടുന്ന ഇടം 

ഇടതടവില്ലാതെ 

കടന്നു കിട്ടണം.

മാടി മാടി വിളിക്കുന്നുണ്ട് 

കടലലകളീയസ്തമന-

സൂര്യനെ വരവേല്‍ക്കാന്‍ ......!

ഖബറടക്കാനുണ്ടാവില്ലൊരു -

'കടലി'വന്‍ വെറും കടലാടിയതി-

നാലാറടിയതെത്രയോ കരണീയ- 

വീടകം,വിധിപോല്‍ .......!

കൂട്ടില്ല,വിട്ടകലാ സഹധര്‍മ്മിണി പോലു-

മൊറ്റ,ക്കെല്ലാ'സാമ്രാജ്യവും'വിട്ടൊഴിഞ്ഞ്‌.....!!

കൂട്ടിനു വരുമത്രേയീ മണ്ണില്‍ ഞാനാട്ടിയകറ്റിയ 

കീടങ്ങള്‍ പരശ്ശതം,കഠിനമാം കൂരിരുട്ടും !!!

മണ്ണിനും പെണ്ണിനും പോരടിച്ച മര്‍ത്യനെ 

വിണ്ണും കനിയാത്തൊരു ഭീതിത സങ്കേതം.

നേരിനെ കാംക്ഷിച്ചു നേരില്‍ ജീവിച്ചവന്‍

പേരു നേടും,കടാക്ഷിക്കും പെരിയോനും.

ധരണിയിലെത്ര തരുണ-താരുണ്യ രത്നങ്ങള്‍ 

തൊലിപ്പുറ സാനന്ദ ചാരു ദൃശ്യങ്ങള്‍,

സ്വന്തമെന്നഹങ്കാരപ്പൊലിമയില്‍ 

തച്ചുടച്ചില്ലേ മാനവ മൂല്യങ്ങള്‍,രക്ത 

ബന്ധങ്ങള്‍,സാത്വിക സായൂജ്യ സത്യസാരങ്ങള്‍ !

വ്യര്‍ത്ഥമേതുചിന്താ സരണിയുമിരു കരകള്‍ -

ക്കുമജ്ഞേയമെങ്കില്‍,കര്‍മ്മഭൂമിയിതൊന്നു-

മാത്രമറിയുക,സഫലമാകട്ടെ യാത്രയും 

ധര്‍മ്മ കര്‍മ്മങ്ങളാലിഹ-പരജന്മങ്ങളും !!

       

*******