നഷ്ട വസന്തങ്ങള്‍

ചാടിപ്പിടഞ്ഞെണീറ്റു കാലേ

മോടിയിലണിഞ്ഞൊരുങ്ങിപ്പുറ -

പ്പെടാന്‍ പാടുപെട്ട നാളുകളിന്നെന്‍

ചടുല ദു:ഖം .

ഓടിച്ചാടി മുന്നില്‍,ഞാന്‍ഞാനെന്ന

ഝടുതിയില്‍ ചാടിക്കടന്ന

തോടും പാടവും കാടും

മേടുമിന്നെന്‍ നഷ്ടസ്വപ്നം .

പടികടന്നു ചെല്ലും പാഠശാലയില്‍

പാടുപെട്ടെത്തും കിടാങ്ങള്‍ക്കക്ഷര-

പിടിവള്ളി പണിയുമായക്ഷീണ

പടുതികളുമിന്നെന്‍ ചുടുനെടുവീര്‍പ്പുകള്‍ .

നാട്യങ്ങളേതുമില്ലാത്ത നാട്ടിന്‍പുറങ്ങള്‍

നീട്ടിനീട്ടിത്തന്നോരോ സ്നേഹ സദ്യകള്‍ ,

കൊടുക്കല്‍ - വാങ്ങലുകളില്‍ ഹൃദയ -

ക്കൂട്ടുകള്‍ ചാലിച്ച പാരസ്പര്യത്തിന്‍ തേന്‍ -

കൂടുകളുമതില്‍ കുടുകുടെ കലപില കൂട്ടി -

പ്പാടും പലപല വര്‍ണസ്വപ്ന കിളിക്കൂട്ടങ്ങളും!

പാട്ടുകള്‍ ,പാഠങ്ങളാട്ടങ്ങള്‍ ചാട്ടങ്ങള്‍

മടുപ്പു വരില്ലൊട്ടുമെത്ര കണ്ടാലും കേട്ടാലും!

പിടപിടക്കുന്നു മമ നെഞ്ചകമാ മധുരസ്മരണക-

ളിടക്കിടെ വന്നെന്‍ മൂകതകളെ നുള്ളി നോവിക്കവേ 
.

പടികയറിപ്പോകുമെന്നായുസ്സുമതില്‍

പടിയിറങ്ങി വരുമോരോ കിനാ ചിന്തുകളും

അടുക്കില്ലയിനിയൊരു മാത്ര,ഒരുമാത്രപോലുമെന്നോര്‍ക്കവേ,

നടുങ്ങുന്നെന്‍ സമസ്ത ബോധ സിരാ മിടിപ്പുകളും  !!

*** *** ***

(ചിത്രം - ഗൂഗിള്‍ )