ചെറുതെത്ര വലുത്

 1-   അധികാരം 

ആനക്കഥകള്‍ കൊള്ളാം 

ചേനക്കഥകളും കൊള്ളാം 

കുഴിയാനക്കഥകളതിലേറെ

കൊള്ളാമെങ്കില്‍ ഹൗ,ഓടിക്കോ,

വെള്ളാനകളുടെ ചോരക്കണ്ണിന്‍ 

ചാരെ നിന്നും ...........!!

2-അടപ്പുകള്‍ 

സൗഹൃദങ്ങളുടെ 

അടപ്പുകളൂരവേ,

തകര്‍ന്ന കുപ്പിക്കഷ്ണങ്ങളെ വിട്ട്

പാവമടപ്പുകളെയെല്ലാം അടുക്കിവച്ച് 

അടുപ്പങ്ങള്‍ക്കൊരു നവ ചിത്രം 

വരച്ചു ,ഞാന്‍ ...........!

അപ്പോഴും -

സൗഹൃദമതിന്‍റെ
 ജീവനൗഷധങ്ങളി-

രുന്നു നാറി,പൊട്ടിയും ചീറ്റിയും !

3- എന്‍റെ ദു:ഖം 

പെയ്യാ മഴതന്‍ വേനല്‍ കിതപ്പായി 

വരളും പുഴതന്നാര്‍ദ്ര ദാഹമായി 

മുള പൊട്ടാത്ത വിത്തിനൂഷര സ്വപ്നമായി 

ഇനിയും പിറക്കാത്ത ,കവനക്കിനാവി-

ന്നിളം ചുണ്ടനക്കവും കാത്തു കാത്ത്

ചില വാക്കുകള്‍ കൂട്ടി വച്ചടയിരിക്കുന്നു

ഞാനെന്ന തള്ളപ്പക്ഷി,ഇപ്പൊഴുമെപ്പോഴും !

വിരുന്നു വരാത്തതെന്തേ ,പേറ്റുനോവിന്റെ 

കവിതക്കുഞ്ഞുങ്ങള്‍ ...............!!

4-ചെറുതെത്ര വലുത് 

'ആനക്കയ'ത്തിലേക്ക്

ഒരാനയെ ഇറക്കി .

തേച്ചു മിനുക്കി നേരെചൊവ്വേ

വഴിനടത്തിയത് ,

ചില -

മനുഷ്യനുറുമ്പുകളും .....!!

5-കുറുമ്പന്‍ 

ഭൂമി തിരയുന്നാകാശം തിരഞ്ഞു 

കുതികുതിക്കുന്നു.

പ്രപഞ്ചമാകെ കറങ്ങുകയാണ്,

ദൈവമേ,നിന്‍ തിരു സ്നേഹ സാന്നിധ്യവും 

തേടിത്തേടി ............!

എന്നിട്ടും മനുഷ്യനിപ്പോഴും 

സ്വയഹത്യയുടെ -

മൗഢ്യസ്വര്‍ഗ്ഗങ്ങളിലും....!!
***
( Image Courtesy = Google )

__________________________