വ്യാമോഹം

( image:Courtesy Google)

കാറ്റില്‍ കടപുഴകിയ മരം 

അയല്‍ക്കാരന്‍റെ വീടിനു 

സാരമായ പരിക്കു പറ്റിച്ചെന്ന്

നേരം വെളുത്താണറിഞ്ഞത്.

ഹൌ!എന്‍റെ വീടിനൊന്നും 

സംഭവിച്ചില്ലല്ലോയെന്ന്‍

ഉള്ളിലൊരാശ്വാസ മന്ത്രണം.

മിന്നലിലാരൊക്കെയോ 

മരിച്ചെന്നും 

വീടുകള്‍ വിണ്ടുകീറിയെന്നും

മീഡിയകളിലൂടെ കാതണഞ്ഞു.

'കഷ്ട'മെന്ന മുക്കുമൂലകളിലാരോ

വെറുതെയിരുന്നു ചൊറിഞ്ഞു......!

ഇരുളിലുരുള്‍ പൊട്ടിയെന്നും 

കാടും മലയും കുത്തിയൊലിച്ചു

വീടും നാടും, റോഡും നഗരവും 

നാശപ്പെട്ടുവെന്നും,കാലേ -

അക്ഷരങ്ങള്‍ മുഖം കറുപ്പിച്ചു.

'വിധി'യെന്നു കുറിച്ചിട്ടകത്താരോ!

എനിക്കൊന്നും വരില്ലെന്നും 

ഞാനെപ്പോഴും സുരക്ഷിതമെന്നും 

ആരാണെന്നെ വെറുതെ സദാ-

വ്യാമോഹിപ്പിക്കുന്നത്.......?! 

****