കസ്റ്റമര്‍കെയര്‍

സഹനത്തിന്‍റെ നെല്ലിപ്പടിയില്‍നിന്നാണ്

കസ്റ്റമര്‍കെയറിലേക്ക് വിളിച്ചത്.

പേരും വേരും കേട്ടവന്‍റെ മുന്നില്‍

പരാതിക്കെട്ടേവം കെട്ടഴിച്ചു -

“പഴയതുപോലെ ഓണാകുന്നില്ല

പലപ്പോഴും ഓഫാകുന്നുമില്ല;

ബട്ടണുകള്‍ഞട്ടടര്‍ന്നപോലെ

തട്ടിത്തടഞ്ഞും തപ്പിപ്പിടഞ്ഞും!!

പെട്ടെന്ന് ചൂടാവുന്നു വെയറുകള്‍-

ഹാര്‍ഡും സ്വാഫ്റ്റും.

പിന്നെ,ഒത്തിരി പിടിക്കുന്നു,

തണുത്തുകിട്ടാന്‍!!

ലൂസ് കണക്ഷനുകള്‍കൊണ്ടാവാം

ഫ്യൂസററു പോകുന്നു-

ചാര്‍ജു ചെയ്യാത്ത ഊര്‍ജ സംഭരണികള്‍

വറ്റിച്ചും സംവിധാനനങ്ങള്‍തെറ്റിച്ചും !

പറ്റിപ്പോയിട്ടുണ്ട് തെറ്റായ

കൈമാറ്റങ്ങളറിഞ്ഞുമറിയാതേയും.

അടവുകള്‍തെറ്റിക്കാന്‍പലപല –

അടവുകള്‍പയറ്റിയിട്ടുണ്ടെന്നതും സത്യം.

മെനുവും മാനുവലും പാലിക്കാറുണ്ട് –

സുനിര്‍ണ്ണിത മെസ്സേജുകളും,കുറേയൊക്കെ.

ഒട്ടുമേ തന്നിട്ടില്ലല്ലോ ഒരു ഗ്യാരണ്ടിയും,

തൊട്ടടുത്തെത്തി, തന്ന വാറണ്ടിയും!

കണ്ണുമിഴിക്കാത്തതെന്തേ ഈ റേഞ്ചുകളതിനാല്‍

തെന്നിപ്പോകുന്നു പല അറേഞ്ച്മെന്റ്സും,വൃഥാ...!!”

എല്ലാം കേട്ട അങ്ങേ തലയിലൊരു ദീര്‍ഘമൗനം

വല്ലാതെ വാചാലമായോ, ദയാപരസവിധം !

ഈ 'പ്ലാറ്റ്ഫോം' എന്‍റേതു മാത്രമെന്ന

സ്വാര്‍ത്ഥതയില്‍നിന്നും പടിയിറങ്ങിയെന്‍

പിന്നിലേക്കു,മിരു പാര്‍ശ്വങ്ങളിലേക്കും

കണ്ണയക്കവേ,

ഉള്ളിലൊരുമിന്നലെറിഞ്ഞിടി വെട്ടി –

“നീയെത്ര ഭാഗ്യവാന്‍!!”

              ____________

               __>>NMK<<___

{-image=Google-}