വിരല്‍ തുമ്പിലെ ആകാശവും ഭൂമിയും !

(Image courtesy - Google )

'വിതയ്ക്കുന്നില്ല കൊയ്യുന്നില്ല 'വെറുതെ

കൊറിച്ചിടും വാക്കുകള്‍ !!

അകലെ -

കടല്‍ദൂരങ്ങള്‍ ക്കമപ്പുറമിപ്പുറം;

അരികെ -

അതിരുമറകള്‍ തന്‍ കണ്‍വെട്ടത്തും ;

കാതോരവാതിലുകള്‍ തുറന്നെത്തും

വാക്കുകള്‍ക്കാരൊക്കെയോ

വലയെറിഞ്ഞളന്നു കൊയ്യുന്ന

നിമിഷങ്ങളുടെ വിനിമയ വില -

കണ്ണായിരം,കാതായിരം

കുമിഞ്ഞു കവിഞ്ഞ് ...!!

         **         **

മനസ്സ് പതപ്പിച്ചൊട്ടിച്ച

കടലാസ് തുണ്ടുകള്‍ ,

അക്കരെയിക്കരെ പ്രാണ -

നൂലുകളില്‍ കോര്‍ത്ത

കാത്തിരിപ്പിന്റെയാകാശ -

പ്പട്ടങ്ങളായി പറന്നിറങ്ങവേ ,

വിരുന്നൊരുക്കുന്ന വാക്കുള്‍ക്ക്

കണ്ണീരുമ്മകളുടെ നനവ്‌ !!

         **         **

നാണത്തിന്റെ നാടന്‍ ശീലുകള്‍

വളകിലുക്കുന്ന നാട്ടുവഴികളില്‍

വിരഹത്തിന്റെ നൊമ്പരത്തിപ്പൂക്കള്‍

വിടര്‍ന്നു നിന്നു ,ആകാംക്ഷയോടെ-

വാക്കുകളുടെ 'കാക്കി'വഴികളിലേക്ക്

വഴിക്കണ്ണെറിഞ്ഞ് .....!!

         **          **

ഇണക്കിളികള്‍ പറന്നകന്ന

തുണയില്ലാ കൂടുകളിലെ

പ്രണയത്തേങ്ങലുകള്‍ക്ക്

പ്രാണന്റെ ഇശലീണം മീട്ടി

'കത്തുപാട്ടി'ന്റെ മഷിത്തുള്ളികളില്‍ ,

എസ്.എ.ജമീല്‍ ,ഇന്നലെയുടെ  -

നാട്ടധരങ്ങളില്‍ .......!!

ഇന്ന് -

വിരല്‍ തുമ്പിലെ നെഞ്ചകങ്ങളായി

വിരിയുന്നു,വിതുമ്പുന്നു -

സ്വപ്നങ്ങളിലെ

സ്വന്തം ഭൂമി ........!!

.......................................